Snýr höfðinu í hálfhring

Myndband af ungum dreng í Miami Heat treyju fer nú líkt og eldur í sinu um veraldarvefinn. Drengurinn er nefnilega búinn hæfileika sem fólk er ekki vant að sjá nema þá helst í hryllingsmyndum eða hjá uglum.

Myndbandið sýnir hvernig faðir drengsins heldur báðum höndum um höfuð sonar síns og skyndilega snýr drengurinn sér snöggt. Í raun snýr hann sér í hálfhring en höfuðið snýr ennþá eins.

Það er morgunljóst að hreyfing sem þessi er afar óeðlileg og getur hreint út sagt ekki verið holl nokkrum manni. Myndbandið af þessu má sjá hér að neðan en mælt er gegn því að viðkvæmir horfi á það og að auki er mælt stranglega gegn því að nokkur reyni að leika það eftir sem strákurinn gerir.