Gamall draumur að rætast

Arna Ýr Jónsdóttir, Ungfrú Ísland 2015, er stödd í Sanya í Kína þar sem hún tekur þátt í Miss World. Keppnin fer fram á laugardagskvöld en langur og strangur undirbúningur hefur farið fram síðan í nóvember.

 

Arna Ýr var kosin Ungfrú Ísland í byrjun september og hlaut þá einnig titilinn Miss World Iceland. Arna er tvítug Kópavogsmær og segir upplifun sína í Kína mjög góða. „Mér líður æðislega vel hérna,“ segir hún og bætir við að tungumálið sé stærsti vandinn. „Heimafólk skilur ekki ensku og stundum getur það verið flókið en annars er allt yndislegt hérna og ég nýt hvers augnabliks,“ segir hún.

Þegar Arna er spurð hvort eitthvað hafi komið henni á óvart, svarar hún: „Já, það kom mér á óvart hversu frábærar stelpurnar eru. Sömuleiðis hvað ég hef eignast góðar vinkonur á stuttum tíma. Það kom mér líka á óvart hversu vel ég hef staðið mig andlega. Mér var sagt að þetta yrði erfitt. Ég gæti átt erfiða daga, fengið saknaðartilfinningu og orðið mjög þreytt. Mér hefur aldrei liðið illa hérna eða verið leið, þetta er miklu auðveldara en ég átti von á sem er frábært.“



VAKNAR KL. 5



Arna hefur staðið í ströngu undanfarnar vikur þar sem dagskráin er stíf. „Ég vakna yfirleitt klukkan fimm í síðasta lagi og er mætt í morgunmat klukkan hálf sjö. Æfingar hefjast klukkan sjö og eru allan daginn. Ef það er frí frá æfingum erum við í ferðum, viðtölum eða að sinna öðrum mikilvægum störfum,“ segir hún. Þegar við ræddum við Örnu var verið að byggja svið fyrir utan hótelið hennar sem notað verður á laugardag þegar keppnin fer fram.



Arna hafði ekki langan tíma til að undirbúa sig fyrir ferðina þar sem stutt er síðan Ungfrú Ísland var haldin hér á landi. „Ég hafði tvo mánuði til að undirbúa mig og hef notað allan þann tíma vel,“ segir hún.

DRAUMUR Í LAUMI



Þegar hún er spurð hvort það sé gamall draumur að rætast að taka þátt í þessari keppni, játar hún því. „Já, svona í laumi. Ég hafði alltaf áhuga en talaði aldrei um það. Svo þetta er gamall draumur að rætast en fáir vita það.“

Arna Ýr var aðeins tíu ára þegar Unnur Birna Vilhjálmsdóttir var kjörin Miss World árið 2005 eða fyrir tíu árum. Arna segist muna vel eftir þeirri stundu. „Ég sá ekki sólina fyrir henni. Hugsanlega kveikti sú upplifun áhuga minn á Miss World,“ segir Arna sem verður á stífum æfingum í Sanya næstu daga. „Það eru spennandi dagar fram undan, fullir af spenningi, þreytu en samt gleði og hamingju.“

HVAR VERÐA JÓLIN?



Ef Arna kemst í úrslit, það er topp fimm, þarf hún hugsanlega að vera viku lengur í Kína eftir að keppni lýkur. Þá þarf hún að halda jólin þar. Henni er sama um það. „Jólin koma alltaf aftur en þessi einstaka lífsreynsla er eitthvað sem ég ætla að taka með mér hvert sem ég fer og njóta meðan á henni stendur,“ segir hún. Ef hún kemst ekki áfram getur hún notið jólanna heima í faðmi fjölskyldunnar. Hins vegar er aldrei að vita hvaða tækifæri bjóðast í framtíðinni. „Það hefur ýmislegt breyst í lífi mínu eftir að ég hlaut titilinn Ungfrú Ísland, til dæmis þessi ferð til Kína. Ég hef kynnst yndislegu fólki, 120 stúlkum frá mismunandi menningarheimum en sjálf hef ég ekkert breyst. Ég vil halda í það sem ég geri og mín framtíðarplön,“ segir Arna en hún kom mjög vel út úr svokölluðu dómaraviðtali. „Nú er bara að gera mitt besta á sviðinu og njóta.“



Þess má geta að Linda Pétursdóttir, Miss World 1988, er dómari í þessari keppni og því stödd í Sanya ásamt dóttur sinni, Ísabellu. Keppnin verður sýnd í beinni útsendingu á laugardag en talið er að rúmlega milljarður manna fylgist með henni. Sex fyrrverandi Miss World stúlkur eru meðal dómara.

GOTT GENGI



Íslendingar eiga þrjár Miss World stúlkur og keppnin vekur ávallt athygli. Þetta er 65. keppnin en frá árinu 2003 hefur hún verið haldin í Kína. Sanya er ákaflega glæsilegur strandstaður á eyjunni Hainan og vinsæll ferðamannastaður. Það ætti því ekki að væsa um stúlkurnar á þessum fallega stað. Landslagið þykir einstakt í Sanya og hótelið, þar sem stúlkurnar dvelja, sannkallaður lúxus.

Þegar rætt var við Örnu Ýri eftir keppnina hér heima í september, sagði hún: „Eftir fimm ár sé ég mig sem hamingjukonu og reynslunni ríkari. Búin að ferðast um heiminn og hef tekið þátt í góðgerðarstörfum erlendis. Eftir fimm ár verð ég háskólanemi í hjúkrunarfræði að stefna á ljósmóðurina hvort sem það verður hér á Íslandi eða erlendis.