Spjallaði við foreldrana á Skype í miðju fallhlífarstökki

Þú þykir varla maður með mönnum lengur nema að hafa ferðast um heiminn á einhverjum tímapunkti. Margir foreldrar kannast því við þá tilfinningu að heyra óreglulega í börnum sínum og þá yfirleitt þegar þau eru í rólegheitum á gistiheimilum eða kaffihúsi. Hinn írski Roger ákvað hins vegar að fara aðra leið.

Roger er um þessar mundir staddur í Sydney í Ástralíu og ákvað fyrir skemmstu að fara í fallhlífarstökk. Það hafði hann hins vegar ekki sagt foreldrum sínum. Hann hringdi í þau með Skype á meðan hann var um borð í flugvélinni og leyfði þeim að fylgjast með á meðan hann féll til jarðar.

Það er óhætt að segja að gamla settinu hafi brugðið örlítið þegar hann stökk út og í kjölfarið fylgdi írskur fúkyrðaflaumur. Myndband af þessu bráðsniðuga uppátæki hefur ratað inn á vefsíðuna Youtube og má sjá það hér að neðan.