Með berjalit á vörunum

Eitt af heitustu tískutrendum um þessar mundir eru dökkar varir. Sumir ganga svo langt að hafa varirnar næstum því svartar. Tískuhönnuðurinn Marc Jacobs setti dökkan berjalit á fyrirsætur sínar þegar hann kynnti haust- og vetrarlínu sína. Dökkrauðar varir passa auk þess vel við jólahátíðina.



Sandra María Ásgeirsdóttir förðunarfræðingur segir að dökkir berjalitir á varirnar séu mjög vinsælir um þessar mundir. „Rauði liturinn er síðan alltaf klassískur um jólin. Ef ég ætti að lýsa jólaförðuninni myndi ég segja falleg, ljómandi húð og gylltir, brons og brúnir augnskuggar. Þá er gaman að nota glimmer um áramótin,“ útskýrir hún. „Það geta allir notað þessa liti, einungis þarf að finna rétta litinn fyrir hvern og einn. Ég myndi ráðleggja konum að fá leiðbeiningar um þennan eina rétta lit hjá starfsfólki í snyrtivöruverslunum,“ segir hún enn fremur.

Sandra María hefur unnið við förðun í auglýsinga- og kvikmyndagerð. Hún fylgist vel með tískustraumum. „Þessir dökku berjalitir eru mjög fallegir og hægt að fá þá í ýmsum útgáfum. Best er að láta fagfólkið aðstoða sig,“ segir hún. Þegar Sandra er spurð hvort mikið máluð augu séu enn í tísku, svarar hún því játandi. „Það fer eiginlega eftir því hvað stúlkur vilja mála sig mikið. Sumar vilja vera mikið farðaðar. Hins vegar er hægt að vera dökkur um augu með réttri förðun án þess að vera mjög mikið málaður,“ svarar hún.

Sandra bætir við að hver kona geti alveg ráðið eigin förðun og ekki sé endilega nauðsynlegt að fylgja tískutrendum. Hún segir að eyeliner sé enn mikið notaður og fyrir jólin sé skemmtilegt að nota brúnan eða bronslitaðan í stað þess svarta. Eyeliner er upplagt að setja bæði undir og yfir augun. Þá segir Sandra að sumir telji að ekki ætti að vera sami litur á augum og á jólakjólnum. „Mér finnst ekkert þurfa að fara eftir því. Það er til dæmis allt í góðu að hafa glimmer á augum þótt maður sé í glitrandi-kjól.“

Sandra hefur starfað sem förðunarfræðingur í nokkur ár en förðun hefur alltaf verið áhugamál hjá henni. Hún útskrifaðist í fyrra og hefur síðan sótt fagnámskeið í London. „Það hefur aukist mjög mikið að konur komi í förðun fyrir jólahlaðborð, nýársfagnaði eða árs­hátíðir,“ segir hún.

Líklegast eru flestir sammála um að falleg förðun dragi það besta fram í hverri konu. Þegar Sandra er spurð um tískuna eftir áramót, svarar hún. „Dökku berjalitirnir verða áfram í vetur.“