„Nógu mikil refsing að þurfa að lifa með svona fáfræði“

„Hann hótaði að berja mig, einfaldlega af því að ég fæddist,“ segir Selfyssingurinn Trausti Þór.

Í myndbandi sem Trausti birti á Facebook segir hann frá því þegar hann var ásamt vinkonum sínum á leið heim frá skemmtistaðnum Fróni á Selfossi þegar maður, sem hann þekkti lítið til, vatt sér upp að honum.

„Hann sér naglalakk. Svo byrjar hann að drulla yfir mig og segja hvað þetta sé ógeðslegt og spurði hvort ég væri hommi. Ég sagði já enda er ég samkynhneigður. Þá fór hann að segja að ef við værum í heimalandi hans þá myndi hann bókstaflega myrða mig. Þetta var hræðilegt. Hann hótaði að hringja í fólk og fá það til að berja mig.“

Trausti segist ekki hafa orðið fyrir svipuðum hótunum áður en að þær viðgangist þó víða – og greinilega líka hér á landi.

Fordómar eru til allstaðar en ef við stöndum öll saman þá hafa þeir ekkert á okkur. Endilega deilið, langar að hjálpa eins mörgum og ég get. ❤️ getið talað við mig hér, eða addað mér á snapchat: trausti97 ❤️ Viktoría Sól Jóhannsdóttir Sigríður Hulda Stefansdóttir Cristina Andrea Waldos Þóra Björg Þórðardóttir Dagný Ósk Hafsteinsdóttir Dmitry Grabyuk Ósk Tryggvadóttir Ásta Petrea Hannesdóttir Tinna Rut Hannesdóttir

Posted by Trausti Þór on Friday, 20 November 2015

„Mér líður bara ömurlega að þetta sé að gerast í heiminum. Þetta er að gerast á hverjum degi fyrir fólk,“ segir Trausti.

„Svo heyrði ég frá einstaklingi að ég ætti að virða það að hann væri alinn upp við þetta, sem er bara matröð. Fólk er að kenna börnunum sínum þetta, að þetta sé rétta leiðin; ofbeldi og hatur sé einhver leið til að lifa. Ef maður hefur þessar skoðanir, að þeir séu á móti mér, þá er mér alveg sama. Svo lengi sem þeir halda þeim með sjálfum sér,“ segir Trausti,

Í myndbandinu þakkar hann vinum sínum fyrir stuðninginn og hvetur alla þá sem kunna að verða fyrir svipuðum hótunum að tala við einhvern. 

„Ég er bara segja að fólk sem er að lenda í þessu daglega, fólki sem líður illa, að það besta sem þið getið gert er að tala við einhvern. Þið haldið kannski að þið hafið engann til að tala við en það er alltaf einhver,“ segir Trausti. Hann segist hafa fyrirgefið manninum.

„Ég veit að það eru margir sem eru að hóta að berja hann og meiða hann. Ég hef heyrt að hann þori ekki lengur í skólann. Ég held að það sé best að láta hann vera því það er nógu mikil refsing að þurfa að lifa með svona fáfræði.“