Vegamót verða aftur að skemmtistað

Þeir sem hafa saknað skemmtistaðarins Vegamóta geta nú tekið gleði sína á ný. Staðurinn verður opnaður aftur sem skemmtistaður þann 11. desember en undanfarin tvö og hálft ár hefur hann eingöngu verið veitingastaður.

Vegamót voru einn stærsti skemmtistaður landsins um áraraðir og vakti það því mikla athygli þegar eigendur hans ákváðu að einbeita sér að því að selja veitingar og byrja að loka fyrr á kvöldin. „Pælingin okkar var alltaf að hvíla skemmtistaðinn í einhvern tíma og opna svo aftur. Okkur hefur langað að opna aftur nokkuð lengi og mátum það svo að nú væri kominn tími á það,“ segir Óli Már Ólason, annar eigendanna.

Partístemning

Óli Már segir að hjá Vegamótum ætli allir að einbeita sér að því að halda gott partí, þar sem vinsæl tónlist verði spiluð. „Við ætlum að halda opnunar­partí 11. desember. Við höfum verið að breyta staðnum helling undanfarið. Við hlökkum bara mikið til.“

Hann bætir því við að margir gamlir fastakúnnar og aðrir hafi beðið um lengri opnunartíma. „Já, við heyrðum oft í fólki sem vildi að við opnuðum aftur sem skemmtistaður, einhverjum sem fannst eitthvað vanta. Vegamót voru auðvitað einn helsti skemmtistaðurinn í miðbænum í fimmtán ár.“

Fastakúnnar sáttir

Blaðamaður heyrði í nokkrum fastakúnnum staðarins, sumum sem hafa sótt staðinn nánast frá opnun. Allir sem blaðamaður ræddi við fögnuðu lengri opnunartíma og hlökkuðu til að kíkja þangað aftur.

Ásamt Óla Má er Andri Björnsson eigandi. Þeir félagar hafa rekið staðinn saman í rúman áratug. Þeir eru hafa mikla reynslubransanum og eiga í fleiri stöðum í miðbænum. Allt frá því að þeir hófu saman rekstur á Vegamótum hafa þeir boðið upp á fjölbreyttan matseðil. „Í raun hefur aldrei verið meira að gera í veitingunum, en þennan tíma sem við vorum ekki með skemmtistað. En pælingin var alltaf bara að hvíla skemmtistaðinn og nú bjóðum við bara aftur í partí.“