Fyrrum ofurfyrirsætan Cindy Crawford fagnar fimmtugsafmæli sínu þann 20. febrúar á næsta ári, og í tilefni þess gefur hún út bókina Becoming. 

Þar segir hún frá árunum þegar hún starfaði sem fyrirsæta og pressunni að halda sér grannri og ungri.

„Ég var aldrei þessi týpa sem gat borðað hvað sem er og ekki bætt á mig grammi (annað en þú þarna, Kate Moss!). Um leið og ég ákvað að hætta að borða hvítan sykur, brauð og þessháttar, þá hugsaði ég bara um sykur, brauð og þessháttar.“

Crawford segir að núna eftir allan þennan tíma í sviðsljósinu, hafi hún ákveðið að gefa út bók, þar sem almenningur getur fengið að skyggnast inn í þennan furðulega heim þar sem kröfurnar um rétta líkamsímynd eru miklar.

„Fólk verður samt að átta sig á að sem neytendur þá hafa þau völdin. Ef þér líkar ekki myndin af grönnu stelpunni sem þú sérð í blaðinu, þá getur þú hætt að kaupa það. Þannig getur þú haft áhrif. Fyrir mér eru þetta mikilvæg skilaboð sem þurfa að komast til skila og geta stuðlað að heilbrigði og fjölbreytni.“

Bókin kemur út þann 29. september og er hægt að panta hana hér.