Kimishima nýr forstjóri Nintendo

Tatsumi Kimishima hefur verið ráðinn forstjóri Nintendo, en fyrrverandi forstjórinn Satoru Iwata lést í júlímánuði. Kimishima hefur verið framkvæmdastjóri hjá fyrirtækinu síðan í júní 2013 og hefur unnið hjá því síðan árið 2000, en þá var hann yfir Pokemon sviði fyrirtækisins.

Kimishima var ráðinn forstjóri samhliða því að fleiri breytingar voru gerðar á stjórnarháttum. Kimishima mun taka við á miðvikudaginn.

Iwata hafði verið forstjóri frá árinu 2002 og var mjög vel liðinn í japanska leikjamarkaðnum.

Hann var á bak við margar vinsælustu vörur Nintendo. Meðal stærstu sigra hans í forstjórastólnum voru tvær af vinsælustu leikjatölvum fyrirtækisins, Nintendo DS og Wii.

Þær komu Nintendo aftur í fremstu röð í leikjabransanum og tvöfölduðu virði þess.