Ytri Rangá komin vel yfir 7.000 laxa

Veiðin í Ytri Rangá er búin að vera feykilega góð í allt sumar og þrátt fyrir að haustið sé komið er ennþá mikil veiði í ánni.

Ytri Rangá fór yfir 7.000 laxa fyrir þremur dögum síðan og stefnir hraðbyri á 8.000 laxa og nær því líklega fljótlega eftir helgi. Það sem tefur aðeins fyrir tökunni síðustu daga er hvassvirði á svæðinu sem hefur stundum gert veiðimönnum lífið leitt en fram að helgi er spáð frábæru veiðiveðri en svo á að hvessa aðeins aftur en aðeins í einn til tvo daga samkvæmt langtímaspá.

Það er veitt í Ytri Rangá til loka október og sá mánuður gæti vel skilað 1.000 löxum eftir því hvernig áin er stunduð en miðað við gang mála í september er ekkert ólíkegt að hún fari hátt í 9.000 laxa sem er þá þriðja besta árið í henni. Mikið af laxi er á flestum veiðistöðum og ennþá slangur að ganga inn sem sést vel á því að megnið af fiskinum sem er að veiðast er ennþá nokkuð bjartur þó vissulega séu legnir laxar inn á milli. Það verður gaman að sjá hvernig veiðist næstu daga og hvort spá veiðimanna við ána sé rétt að 9.000 laxa múrinn sé takmarkið í ár.