Þúsundir bíla með gallaða loftpúða keyra um götur landsins

Þúsundir bíla með gallaða loftpúða aka um íslenskar götur. Minnst átta dauðsföll í heiminum má rekja til gallans. Ekki er hægt að innkalla bílana strax þar sem varahlutirnir sem þarf til að skipta um gallann eru ekki til á landinu. Þetta kemur fram í Viðskiptablaðinu í dag.

Allir loftpúðarnir koma frá framleiðandanum Takata en talið er að fyrirtækið hafi vísvitandi reynt að hilma yfir gallann í nokkur ár. Yfir 34 milljónir bíla hafa verið innkallaðir sökum þessa og hefur Takata ekki undan að framleiða varahluti. Flestir bílarnir sem um ræðir eru af gerðinni Honda og Toyota.

„Að fenginni reynslu hér hafa engin slys komið upp í sambandi við loftpúðana hjá okkur,“ segir Geir Gunnarsson forstjóri Bernhards í Vatnagörðum sem fer með umboðið fyrir Honda hér á landi. Gallarnir hafa fyrst og fremst fundist í bílum af gerðinni Accord og Civic.