Næstu klukkustundir „gífurlega mikilvægar“

Stjórnvöld Grikklands keppast nú við að leggja lokahönd á tillögur þeirra gegn skuldavanda ríkisins. Grikkir hafa til tíu í kvöld að íslenskum tíma til að skila inn tillögum að þriðju neyðaraðstoð þeirra og koma í veg fyrir mögulega útgöngu þeirra úr evrusamstarfinu.

Kröfuhafar þeirra munu svo fara yfir tillögurnar og fjallað verður um þær á leiðtogafundi Evrópusambandsins á sunnudaginn.

Á vef AP fréttaveitunnar segir að menn séu vongóður um að deiluaðilar muni komast að samningi eftir að Donald Tusk, sem mun stýra fundinum á sunnudaginn, sagði að tillögum Grikkja þyrfti að fylgja tillögur frá kröfuhöfunum. Þær tillögur ættu að snúa að því hvernig hægt væri að gera skuldir Grikkja viðráðanlegar til langs tíma.

Hvort að fella eigi niður hluta af skuldum Grikkja hefur leitt til mikilla deilna síðustu mánuði. Meðal þeirra sem hafa verið hlynntir því eru Alþjóða gjaldeyrissjóðurinn og auðvitað Grikkir. Þjóðverjar hafa hins vegar verið hvað mest á móti þeirri hugmynd og segja að eina leiðin sé að Grikkir dragi saman seglin, lækki lífeyri og hækki skatta.

Alexis Tsipras, forsætisráðherra Grikklands, segir að næstu klukkustundir verði gífurlega mikilvægar. Ríkisstjórn hans er nú á fundi þar sem tillögur þeirra eru ræddar samkvæmt BBC.

Búið er að gefa út að bankar í grikklandi verða lokaðir fram á mánudag sem og þær takmarkanir sem hafa verið á því hvað fólk geti tekið út mikið úr hraðbönkum. Bankakerfi Grikklands er sagt vera að hruni komið.