Stýrðu snjalltækinu án þess að snerta það nokkurntíman

Þeir sem eru leiðir á tökkum geta mögulega fagnað von bráðar. Með tilkomu snjallsímans hafa snertiskjáir verið allsráðandi en nú vill Google stíga næsta skref með því að ekki þurfi lengur að snerta nokkurn hlut til að hækka, lækka, skipta um lag eða hvað það sem þú vilt gera.

Verkefnið kallast Project Soli og nýtir ratsjártækni til að skynja hreyfingar sem síðan stýra tækinu. Útkoman líkist helst einhverjum að leika jedi riddara en frumgerðir af tækninni hafa gefið góða raun. Vinna hópsins var kynnt nú á dögunum.

Á kynningunni sýndi Ivan Poupyrev, en hann fer fyrir hópnum sem hannar tæknina, hvernig hann gat sparkað í stafrænan knött með því einu að gefa selbit í átt að skjánum. Einnig sýndi hann hvernig hann gat stillt stafrænt úr án þess að snerta það.

Á undanförnum tíu mánuðum hefur tekist að gera búnaðinn að baki verkinu svo smáan að í framtíðinni gæti verið mögulegt að koma tækninni í smávaxin snjalltæki. Tæknin gæti einnig spilað stórt hlutverk í stafrænum sýndarveruleikaheim.

„Munum við nota þetta? Ég veit það ekki en til að komast að því þá verðum við að búa þetta til og síðan ákveða hvort vit sé í að gera það,“ segir Poupyrev í kynningarmyndbandi sem má sjá hér að neðan.