Lars Christensen býst við frekari fjármagnshöftum í Rússlandi

Lars Christensen, hagfræðingur Danske Bank, telur að Rússar þurfi að velja milli þess að halda háum vöxtum í Rússlandi eða leyfa gengi rúblunnar að falla frekar. Þetta kom fram í viðtali sem Björn Berg Gunnarsson, fræðslustjóri hjá VÍB, tók við Lars í síðustu viku og má sjá í spilaranum hér að neðan. Lars sér um greiningu á nýmarkaðsríkjum fyrir hönd Danske Bank og hefur því fjallað mikið um rússneskt efnahagslíf í gegnum tíðina.

Lars bendir þó á að veiking rúblunnar myndi valda talsverðum vandræðum fyrir rússnesk fyrirtæki sem skulda lán í erlendri mynt.

Rúblan gæti verið um 15 prósent of sterk miðað við núverandi olíuverð að mati Lars en gengi rúblunnar hefur fallið um 52 prósent miðað við gengi dollarans frá því í júlí á síðasta ári.

Sjá einnig:Klinkið - Lars Christensen

Hratt hefur gengið á gjaldeyrisvaraforða Rússa, sem orðinn er mjög lítill miðað við magn erlendra lána. Það getur valdið vandræðum þar sem rússnesk fyrirtæki eiga í dag erfitt með að sækja sér fjármögnun. Lars telur miklar líkur á að settar verði á enn frekari takmarkanir á flæði fjarmagns til og frá Rússlandi.

Viðtalið við Lars má sjá í spilaranum hér að neðan.