Vara fólk við að tala um persónuupplýsingar nærri sjónvörpum

Eigendur snjallsjónvarpa frá Samsung hafa vakið athygli á því að í skilmálum sjónvarpanna segir að þau taki mögulega upp persónuleg samtöl á heimilum fólks og sendi til þriðja aðila. Um er að ræða sjónvörp sem bjóða upp á raddstýringu, en í skilmálunum varar Samsung fólk við því að ræða um persónuupplýsingar nálægt sjónvörpunum.

Í skilmálunum segir: „Ef töluð orð ykkar innihalda persónu- eða aðrar viðkvæmar upplýsingar, munu þær vera meðal gagna sem safnað er og eru send til þriðja aðila í gegnum raddstýringu sjónvarpsins.“

Samkvæmt vef Forbes geta eigendur slíkra sjónvarpa slökkt á raddstýringunni, en ekki á gagnaöfluninni. Því er ekki hægt að nota raddstýringuna án þess að samtöl fjölskyldna endi í höndum Samsung og samstarfsaðila þeirra.

Talið er að þriðji aðilinn sé bandaríska fyrirtækið Nuance, sem þróaði raddstýringu Samsung.

Left: Samsung SmartTV privacy policy, warning users not to discuss personal info in front of their TV Right: 1984 pic.twitter.com/osywjYKV3W

— Parker Higgins (@xor) February 8, 2015

Samsung segir aftur á móti við Guardian að þessar áhyggjur séu óþarfar. „Við tökum persónuvernd notenda mjög alvarlega.“

Þetta kemur fram í svari fyrirtækisins til Guardian. Þar segir að öllum notendum sé boðið að slökkva á raddstýringunni og að öll gögn séu dulkóðuð. Sé kveikt á raddstýringu sjónvarpsins séu sérstakar setningar sem hægt sé að nota til að stýra sjónvarpinu. Þá segir að á skjánum sé myndband af míkrófón þegar upptaka sé í gangi.