Umtalaðar forsíður

Í gær birtist Caitlyn Jenner á forsíðu Vanity Fair á fallegri mynd sem ljósmyndarinn Annie Leibovitz tók. Er þetta í fyrsta sinn sem heimurinn fékk að kynnast Caitlyn Jenner, áður Bruce Jenner, og óhætt að segja að forsíðan hefur vakið mikla athygli.

Í tilefni af þessari umtöluðu forsíður en tilvalið að rifja upp nokkrar forsíður tímarita sem hafa vakið mikla athygli í gegnum tíðina. Allt frá Demi Moore með óléttukúluna að Kim Kardashian með beran botninn.

Á fyrstu forsíðu Vogue eftir að Anna Wintour tók við sem ritstjóri, í nóvember 1988, var fyrirsætan Michaela Bercu klædd í jakka frá Christian Lacroix og Guess gallabuxum. Þetta var í fyrsta sinn sem gallabuxur sáust á forsíðunni. 

Þau Kim Kardashian og Kanye West prýddu apríl forsíðu Vogue 2014, mánuði fyrir brúðkaupið þeirra og er sú forsíða ein sú umtalaðasta fyrr og síðar. Var þetta einnig í fyrsta sinn sem hashtag sást á forsíðu Vogue.

Á forsíðu Vogue í apríl 2008 voru þau Gisele Bundchen og LeBron James. Fór myndin fyrir brjóstið á mörgum og þótti hún minna um of á kvikmyndina King Kong.

Demi Moore sat fyrir hjá Annie Leibovitz fyrir Vanity Fair í ágúst 1991. Demi var nakin á myndinni og komin sjö mánuði á leið með dóttur sína og Bruce Willis. Myndin hneykslaði marga þá, en er í dag ein sú allra þekktasta. 

Kim Kardashian sat eftirminnilega fyrir með beran botninn á forsíðu Paper fyrir veturinn 2014. Fór internetið í orðsins fyllstu merkingu á hliðina daginn sem blaðið kom út. 

Fyrirsætan Jourdan Dunn sat fyrir á forsíðu breska Vogue í janúar 2015 og var það í fyrsta sinn í 13 ár að lituð fyrirsæta var á forsíðu blaðsins. Naomi Campbell sat fyrir á undan henni árið 2002. 

Að lokum forsíðan sem allir eru að tala um í dag. 

Fylgstu með Glamour á Facebook og á Instagram.