Leyna bágum aðstæðum

„Hlutverk sjóðsins er að tryggja að allir núverandi og framtíðariðkendur hjá Val geti staðið straum af þeim kostnaði sem fylgir því að stunda íþróttir í Val,“ segir Þorgrímur Þráinsson um nýjan styrktarsjóð. Sá hefur hlotið nafnið Friðrikssjóður í höfuðið á séra Friðriki Friðrikssyni, stofnanda Vals.

„Það er miklu meiri þörf fyrir svona sjóð en við gerum okkur almennt grein fyrir,“ segir Þorgrímur sem er einn þeirra þriggja sem skipa stjórn.

„Ég hef alveg heyrt af krökkum sem segjast ekki hafa áhuga á að stunda íþróttir bara til að vernda mömmu og pabba sem hafa ekki efni á að borga æfingagjöld. Þess vegna finnst mér þetta frábært framtak hjá Val og í anda séra Friðriks.

Ég vona að sem flest íþróttafélög á landinu taki upp eitthvert sambærilegt fyrirkomulag því öll börn eiga að hafa sama rétt.   Því miður hefur ástandið verið þannig að einstaka foreldri eða forráðamaður iðkenda í Val hefur ekki haft tök á því að greiða æfingagjöld og hefur sá kostnaður yfirleitt verið afskrifaður af félaginu eða samið um aðrar greiðslur.“

Skipulagsskrá og úthlutunarreglur sjóðsins ásamt umsóknareyðublaði er hægt að nálgast á heimasíðu Vals undir hlekknum Friðrikssjóður. Stofnfé sjóðsins er sjálfsaflafé og búið er að tryggja fjármögnun sjóðsins í þrjú ár hið minnsta.

Þorgrímur segir stjórn sjóðsins meta umsóknir og greinargerðir frá foreldrum eða forráðamönnum barna einu sinni á ári eða oftar og segir allar slíkar umsóknir trúnaðarmál.