Hóta þeim sem munu horfa á The Interview

Hópur hakkara sem kalla sig Guardians of Peace hafa birt tölvupósta framkvæmdastjóra kvikmyndadeildar Sony auk annarra gagna. Með gögnunum sendu þeir frá sér skilaboð til fólks sem ætlar að sjá myndina The Interview.

„Munið þið eftir 11. september 2001. Við mælum með að þið haldið ykkur frá þeim kvikmyndahúsum sem sýna myndina. (Ef þið búið nærri ættuð þið að fara.)“ Þá stóð einnig í skilaboðunum að hvað sem væri í vændum næstu daga, væri græðgi Sony að kenna. „Allur heimurinn mun fordæma SONY.“

Þetta er í níunda sinn sem GOP senda frá sér hluta gagna sem þeir stálu af Sony í nóvember. Meðal þeirra upplýsinga sem komið hafa fram eru launaskrár, kennitölur starfsmanna og sjúkraskrár þeirra, óbirtar kvikmyndir og fjölmargir vandræðalegir tölvupóstar.

Tveir fyrrverandi starfsmenn Sony höfðuðu mál gegn fyrirtækinu á mánudaginn, samkvæmt The Daily Beast. Þeir fara fram á skaðabætur vegna þess að Sony varði persónuupplýsingar um þá ekki nægilega vel.

AP fréttaveitan segir frá því að frumsýningu myndarinnar í New York hefur verið frestað.

Í viðtali við New York Times segja Seth Rogen og James Franco að þeim hafi ekki órað fyrir því að kvikmynd þeirra, The Interview, myndi hafa þessar afleiðingar. Ríkisstjórn Norður-Kóreu, sem grunuð er um að standa að baki GOP, hefur mótmælt myndinni frá því að í ljós kom að hún fjallar um tvo sjónvarpsmenn sem fá það verkefni að ráða Kim Jong-un, einræðisherra Norður-Kóreu af dögum.

Seth Rogen, sem leikur í myndinni og er annar leikstjóri hennar, segir að það sé ekki klárt að The Interview sé ástæða árásarinnar á Sony.