Elliðavatn kraumaði í morgun

Það falleg sjón sem blasti við þeim fáu veiðimönnum sem mættu uppá Elliðavatn í morgun því vatnið var stillt og vakir hreinlega út um allt.

Það er óvenjulegt að sjá svona mikið líf snemma í maí en það var alveg sama hvert var litið, alls staðar var fiskur að vaka og sumar vakirnar voru ansi stórar.  Helluvatnsmeginn við brúnna var hægt að horfa á urriðana með berum augum þar sem þeir syntu alveg upp við land og gripu púpur sem héngu í yfirborðinu.  Það er greinilegt að flugnaklak virðist vera komið í gang og það þýðir að þurrflugan fer að verða besta vopnið.  Á svona sólríkum dögum eins og í dag er best að vera kominn upp að vatni um sjö að morgni því þá er besta takan.  Hún dettur svo niður um tíu eða ellefu og það er lítið að gerast yfir hábjartann daginn.  Fiskurinn virðist svo fara aftur af stað seinnipartinn og veiðin getur oft orðið mjög góð þegar líður á kvöldið.  Á björtustu dögunum er oft besta veiðin um miðnættið.