Bílasala í Evrópu jókst um 2% í ágúst

Nýliðinn ágúst var langt frá því besti bílasölumánuður ársins í Evrópu en 2% aukning varð þó í mánuðinum. Það sem af er liðið ári hefur hinsvegar orðið 6% aukning í bílasölu í álfunni eftir langt samdráttarskeið. Salan í ágúst nam 701.118 bílum en var 688.464 bílar í fyrra. Salan það sem af er ári er 8.64 milljónir bíla.

Bílasala á Spáni jókst mest í álfunni, eða um 14% og í Bretlandi nam hún 9,4%. Salan minnkaði hinsvegar í öllum öðrum stórum löndum álfunnar, Þýskalandi, Frakklandi og Ítalíu. Búist er við því að bílasala muni aukast til ársins 2020, þrátt fyrir að þá sé ekki búist við því að salan nái sömu hæðum og hún var á árinu 2007, sem var metár. Meðalaldur bíla í Evrópu er nú 8,2 ár en til samanburðar er hann ríflega 12 ár á Íslandi.

Af einstökum bílaframleiðendum er það að segja að Ford sá 15% söluaukningu í ágúst og spilaði góð sala Fiesta bílsins þar stóran þátt. Volkswagen Group bílafjölskyldan náði 9% söluaukningu og Volkswagen bílar eingöngu seldust 14% betur en í fyrra, Skoda bílar 21% og Seat 5%. Hinsvegar féll sala Audi bíla um 8% í Evrópu. BMW sá 2% minnkun og Mercedes Benz 4%. Þessi 3 þýsku merki selja samt meira í heiminum öllum en í fyrra og á góð sala í Kína og Bandaríkjunum þar mestan þátt.

PSA/Peugeot-Citroën seldi 2% fleiri bíla í ágúst en í fyrra. Opel og Vauxhall náði 8% aukningu. Af asísku framleiðendunum náði Mitsubishi mestri aukningu, eða 49%, Hyundai og Kia náðu 1% aukningu en sala Toyota- og Lexus bíla féll um 8%. Jaguar Land Rover hélt áfram góðu gengi sínu og seldi 19% fleiri bíla og var með því eina lúxusbílamerkið sem jók við sölu sína á milli ára.