Lotus segir upp fjórðungi starfsfólks

Ekki gengur alltof vel hjá breska sportbílaframleiðandanum Lotus og hefur fyrirtækið tilkynnt um uppsögn fjórðungs af starfsfólki sínu. Það þýðir að 325 starfmenn missa vinnu sína. Kemur það í kjölfar fækkunar á 201 starfsmanni í fyrra.

Fyrirtækið hefur verið rekið með tapi undanfarin ár og ekki er langt síðan að skipt var um forstjóra þess, sem hafði uppi óraunsæjar hugmyndir um stækkun þess og fjölda nýrra bílgerða. Lotus tapaði 33 milljörðum króna á síðasta ári og er það nokkuð vænt tap fyrir ekki stærra fyrirtæki.

Sala á Lotus bílum hrapaði um heil 40% á síðasta ári og seldi það aðeins 1.177 bíla. Gárungarnir hafa sagt að Lotus standi fyrir „Lots Of Trouble Usually Serious“ og ef vegferð þeirra heldur áfram á sömu braut er ekki langt þess að bíða að fyrirtækinu verði lokað.

Færi þá enn einn skemmtilegur breski sportbílaframleiðandinn yfir móðuna miklu. Yrði slíkt mikil synd fyrir margan bílaáhugamanninn því sannarlega hefur Lotus framleitt margan magnaðan bílinn, auk þess sem Lotus hefur tengst liði í Formúlu 1 afar lengi, sem borið hefur nafn þess.