Linda Pé bjargar hryssu

Linda Pétursdóttir brást skjótt við þegar hún sá hryssu fasta í skurði í sjálfheldu við Bessastaðafleggjarann í dag.  Við ræddum við einn af bjargvættunum, Árna Stefán Árnason, hugsaði sig ekki tvisvar um þegar Linda hringdi í hann og bað um hjálp við að bjarga hryssunni.

Fékk óvænt símtal

 „Ég var heima þegar Linda Pétursdóttir hringir í mig og segir mér frá þessu og ég rýk af stað. Ég var nýbúinn að horfa á myndband um björgun á fíl í Kenya," segir Árni og heldur áfram frásögninni:

„Ég fór að Bessastaðaafleggjaranum þar sem hryssan var pikkföst vel upp að hálsi í drullupitti. Þarna var fullt af fólki. Við komum köðlum undir hana og það tókst eftir smá fyrirhöfn að koma henni upp úr skurðinum."

Setur spurningamerki við slysið

„Við byrjuðum á því að toga með aðstoð jeppa en þetta var dálítil fyrirhöfn. Fremri helmingurinn var laus og það kom grafa og við náðum að toga hryssuna upp en hún var örmagna - búin að vera þarna lengi greinilega,“ segir Árni.

„Hún lá þarna í einn og hálfan tíma án þess að standa í fæturna þegar við náðum henni upp úr mýrinni. Við hringdum í dýralækni úr Víðidal sem aðstoðaði okkur. Þannig að það er búið að fjarlægja hestinn og koma honum í hús. Eigandinn er staddur í Svíþjóð en ég á eftir að setja ýmis spurningarmerki við þetta." 

„Mér fannst skemmtilegt að geta tekið þátt í þesssu en hryssan var banhungruð og þurfti sinn tíma til að safna orku. Þarna var vökult auga á ferðinni, hún Linda, en fyrstur kom auga á hryssuna íbúi á Álftanesi sem átti leið hjá. Þetta tókst alveg ljómandi vel," segir bjargvætturinn ánægður.