Svíar hætta við í útboði um nýjar danskar herþotur

Sænska félagið Saab, sem framleiðir Gripen orrustuþotur, hefur dregið sig úr í útboðinu um framleiðslu á nýjum herþotum danska hersins. Til stendur að endurnýja orrustuþotuflota danska hersins árið 2020 og er síðasti dagur til að skila inn tilboði í dag.

Að sögn Politiken er ástæða þess að Saab hafi hætt við sú að Svíarnir búast fastlega við að danska þingið muni taka tilboði um bandarískar F35-vélar þegar velja skal arftaka þeirra F16-þotna sem nú eru notaðar. Þingið mun taka ákvörðun um nýjar vélar í síðasta lagi næsta sumar.

Búist er við að tilboðið hljóði upp á milli 20 og 30 milljarða danskra króna. „F35 hyggst ekki mæta sömu kröfum varðandi danska vinnustaðalöggjöf og hinir þrír þátttakendurnir í útboðinu,“ hefur Politiken eftir sænskum heimildarmanni sínum.

Að sögn sama heimildarmanns verða líkur á að tilboði verði tekið miklar, ef fara skal í kostnaðarsaman lokaáfanga útboðsins. Saab hefur ekki talið líkurnar nægjanlega miklar og því dregið sig úr.