Pylsuframleiðendur sektaðir fyrir verðsamráð

Rúmlega tuttugu pylsuframleiðendur og 33 einstaklingar hafa verið sektaðir fyrir langvarandi verðsamráð í Þýskalandi. The Guardian greinir frá.

Meðal þeirra sem voru sektaðir eru framleiðendur á borð við Meica, Boeklunder, Wiesenhof og Herta, dótturfélag Nestle.

Samkvæmt yfirvöldum í Þýskalandi barst þeim nafnlaus tilkynning um samráðið.

Sektin hljóðar upp á samtals 338 milljónir evra, eða 52 milljarða króna.

„Við fyrstu sýn virðist sektin vera há, en það þarf að taka tillit til þess hversu margir tóku þátt í verðsamráðinu, hversu lengi það stóð yfir og þær háu fjárhæðir sem eru undir í málinu,“ hefur Gurardian eftir Andreas Mundt, forseta þýska samkeppniseftirlitsins.

Verðsamráðið átti sér stað í áratugi, þar sem pylsuframleiðendurnir hittust reglulega til að ræða þróun markaðarins og verð.

Ellefu þeirra fyrirtækja sem eiga hlut að máli viðurkenndu brot sín og hjálpuðu yfirvöldum við rannsóknina.