Eini Ferrari pallbíllinn

Ferrari hefur ekki enn smíðað pallbíla, en það fannst Ultimate Wheels, sem þekkt er fyrir undarlegar breytingar á bílum, alveg ómögulegt. Bíllinn er 1989 árgerðin af Ferrari 412 og eigandi hans er eigandinn af London Motor Museum.

Ekkert var til sparað við að breyta honum í pallbíl og er til að mynda pallurinn með tekkklæðningu, líkt og á alvöru lúxussnekkju. Teknir voru 30 cm ofanaf afturhluta bílsins, en pallurinn er ekki nema tæpur einn metri á lengd.  

Ultimate Wheels breytti ýmsu fleiru í bílnum og er hann með nýtt útblásturskerfi þar sem velja má á milli hljóðsins sem frá honum kemur, öskrandi druna beint frá öflugri vélinni eða mun hæverskari og hljóðlátari hljóms.

Komið er öflugt Bang og Olufsen hljóðkerfi í bílinn og einhverra hluta vegna er komið afar einkennilegt loftinntak („scoop“) á húddið á bílnum. Hver hefur sinn smekk, en erfitt væri að viðurkenna að þessar breytingar hafi jákvæð áhrif á annars þennan fallega bíl, þó vandað hafi verið til verks.