Bílar

Hagnaður Ford minnkar um 39%

Finnur Thorlacius skrifar
Ford F-150 pallbíllinn er söluhæsta einstaka bílgerðin í Bandaríkjunum.
Ford F-150 pallbíllinn er söluhæsta einstaka bílgerðin í Bandaríkjunum.
Ford hefur skilað inn uppgjöri sínu fyrir fyrsta ársfjórðung þessa árs og það var ekki til að gleðja hluthafa að hagnaðurinn minnkar um 39% frá árinu í fyrra. Hagnaðurinn var þó 118 milljarðar króna, en var 185 milljarðar í fyrra.

Allur hagnaður Ford kemur á heimavelli í Bandaríkjunum og gott betur en það því þar hagnaðist Ford um 170 milljarða króna. Verra gengi annarsstaðar í heiminum dregur niður hagnað Ford. Í Evrópu nam tapið 22 milljörðum króna en minnkaði þó verulega frá fyrra ári, er tapið var 48 milljarðar.

Annað markaðssvæði sem Ford tapaði á er í S-Ameríku og var það 58 milljarðar og jókst úr 25 milljörðum frá því í fyrra. Reksturinn í Kína og restinni af Asíu skilaði þó 33 milljarða króna hagnaði. Ford hagnaðist einnig á starfsemi sinni í miðausturlöndum og Afríku og skilaði hún 6 milljörðum í kassann.  

Ford seldi 6% fleiri bíla á fyrsta ársfjórðungi í ár en í fyrra, en salan í Bandaríkjunum minnkaði samt um 3%. Í þessu uppgjöri Ford nú verður að taka tillit til þess að Ford setti til hliðar 45 milljarða króna í sjóð sem notaður verður ef til skyndilegra innkallana kemur. Ef sá sjóður hefði bæst við hagnaðinn hefði hann aðeins orðið 12% minni en í fyrra, ekki 39% minni.

Mest lesið




×

Mest lesið