Aukin bílasala í febrúar

Sala nýrra bíla í nýliðnum febrúar var 562 bílar og jókst um 32,9% frá síðasta ári, en þá seldust 423 bílar. Kemur þessi aukning í kjölfar 21,2% aukningar í janúar og því nemur söluaukningin það sem af er ári 26,5%.

Ef sala bílaleigubíla er dregin frá þá jókst salan í febrúar um 9,5% og salan í janúar um 19,7%. Án bílaleigubíla jókst salan fyrstu tvo mánuði um 15,0%. Þetta er meiri vöxtur en búist var við og greinilegt að bæði fyrirtæki og einstaklingar eru farin að endurnýja bíla sína enda margir þeirra orðnir ansi gamlir og mikið eknir.

Það er einnig áhugavert,  og til marks um breyttar áherslur bílkaupenda, að af mest seldu fólksbílunum á almenna markaðnum, að frádreginni sölu til bílaleiga í febrúar eru tveir smábílar, Ford Fiesta og Toyota Yaris. Þriðji bíllinn, sem seldist álíka vel er svo jepplingurinn Honda CR-V, en jepplingar hafa mjög átt uppá pallborðið undanfarið. 

Leiða má að því líkum, miðað við þessa ágætu sölu í byrjun árs, að 9000 bílar seljist á árinu. Í fyrra seldust 7913 bílar og stefnir í 14% vöxt. Ef þessi spá gengur eftir þá er samt ekki um að ræða neitt sérstaklega stóran bílamarkað á þessu ári. Meðalsala bíla undanfarin 10 ár hefur verið um 11.500 bílar á ári þannig að enn nokkuð mikið svigrúm til vaxtar.

Sala fólksbíla án bílaleigubíla í febrúar

Tegund               Sala í febrúar

Ford Fiesta                 16

Toyota Yaris               16

Honda CR-V                16

Renault Clio                13

Volkswagen Golf         11

Skoda Octavia            10

Toyota Land Cruiser   10

Chevrolet Spark         10

Chevrolet Captiva      10