Störfum fjölgað um 175 þúsund

Atvinnurekendur í Bandaríkjunum fjölguðu störfum um 175 þúsund í febrúar, sem er mun meira en mánuðina þar á undan. Atvinnuleysi jókst þó um 0,1 prósentustig og er það vegna þess að fleiri Bandaríkjamenn hófu aftur atvinnuleit í mánuðinum.

Viðskiptatengd þjónusta, heildsöluviðskipti og matvælaframleiðsla voru þær greinar þar sem mest aukning varð í fjölda starfa á meðan störfum fækkaði í upplýsingaiðnaði. Fjöldi starfa í heilbrigðisþjónustu, byggingaframkvæmdum og smásölu hélst nokkurn veginn eins.

Þessi 175 þúsund störf er það lágmark nýrra starfa sem þurfa að verða til í landinu til að halda í við fólksfjölgun og minnka atvinnuleysi, en bæði í desember og janúar var fjöldinn töluvert undir þeim mörkum.

Langtímaatvinnulausir í febrúar voru 3,8 milljónir og hefur fækkað um tæplega milljón frá árinu áður. 6,4% karlmanna og 5,9% kvenna eru í dag atvinnulaus.

Stærsti einstaki hópur atvinnulausra eru táningar, en 21,4% þeirra eru atvinnulaus. Inn í þessar tölur vantar rúmlega tvær milljónir manna sem hafa gefist upp á sinni atvinnuleit eftir að hafa verið án atvinnu í meira en 12 mánuði.