Kaupin á Nokia önnur stærstu fyrirtækjakaup Microsoft

Kaup bandaríska hugbúnaðarfyrirtækisins Microsoft á tækja- og þjónustudeild finnska farsímaframleiðandans Nokia fyrir 7,2 milljarða dala, um 870 milljarða króna, eru önnur stærstu fyrirtækjakaupin í sögu fyrirtækisins. Stærstu kaup fyrirtækisins voru þegar það keypti netsímafyrirtækið Skype fyrir 8,5 milljarða dala, um eitt þúsund milljarða króna, árið 2011.

Kaupin eru einnig merkileg í ljósi þess að farsímafyrirtækin Nokia, Motorola og Ericsson, upprunalegu brautryðjendurnir á farsímamarkaðinum, hafa nú öll hætt sjálfstæðri framleiðslu á farsímum. Þau marka nýja tíma hjá Microsoft sem ætlar nú að bæta framleiðslu á farsímum við sölu á stýrikerfum fyrir farsíma. Nokia var áður risi á farsímamarkaðinum en hefur undanfarin ár dregist aftur úr í kjölfar aukinnar samkeppni í sölu á snjallsímum frá fyrirtækjum eins og Samsung og Apple.

Guðmundur Sigurðsson, framkvæmdastjóri Hátækni, umboðsaðila Nokia á Íslandi, segir fréttir um sölu Nokia hafa komið sér nokkuð á óvart þar sem fyrirtækið hafi að hans sögn aukið við sig markaðshlutdeild að undanförnu, en bætir því við að hann hafi lengi heyrt orðróm þess efnis að viðræður væru í gangi á milli fyrirtækjanna.

Hann segir breytingarnar að öllum líkindum eiga eftir að hafa jákvæð áhrif á stöðu íslenska umboðsaðilans. „Þarna eru tvö öflug fyrirtæki að fara undir merki Microsoft og ég geri ekki ráð fyrir öðru en að þetta efli vöruþróun og vöruframboð Microsoft. Við höfum fengið þær upplýsingar að Microsoft ætli sér að nýta áfram söluleiðir Nokia og á ég því ekki von á að þetta raski okkar starfsemi.“