Fyrrum forstjóri Volvo ráðinn til GM

Níu mánuðir eru liðnir síðan Stefan Jacoby steig af stól forstjóra Volvo og kom það reyndar mörgum á óvart. Eitthvað var hann reyndar ekki alveg sammála eigendum Volvo, hins kínverska Geely og stjórn þess og því fór sem fór.

Jacoby þurfti ekki að bíða ýkja lengi eftir stórri stöðu í bílaheiminum því nú hefur hann verið ráðinn til General Motors og mun þar bera ábyrgð á sölu GM bíla í öðrum löndum en heimalandinu Bandaríkjunum. Það þýðir reyndar í meira en 100 löndum. Hinn þýskættaði Jacoby leysir af Tim Lee, sem setjast mun í stjórn GM í Kína.

Jacoby hefur komið víða við því áður en hann varð forstjóri Volvo var hann yfir sölumálum Volkswagen í Kína, svo hann ætti að þekkja það að selja bíla í öðrum löndum en heimalandi framleiðandans.