easyJet flutti 60 milljón farþega á einu ári

Fleiri en 60 milljónir farþega ferðuðust með flugfélaginu easyJet á tólf mánuða tímabili, miðað við 31. maí 2013.  Þetta var í fyrsta skipti sem fjöldi farþega fór yfir 60 milljónir á tólf mánaða tímabili.

Í tilkynningu segir að u.þ.b 10 milljónir farþegar ferðuðust með easyJet síðustu 12 mánuði í viðskiptaerindum sem er til marks um hversu víðfemt leiðarkerfi félagsins er orðið. easyJet flýgur á fleiri af 100 vinsælustu flugleiðum í Evrópu en nokkurt annað flugfélag.

Þegar easyJet var stofnað í nóvember árið 1995 rak það aðeins tvær flugvélar sem flugu á milli áfangastaða innan Bretlandseyja. Nú, aðeins átján árum síðar, á easyJet flota sem samanstendur af 212 farþegaþotum og flugvélar félagsins lenda á 137 flugvöllum í 33 löndum í Evrópu og Norður Afríku.

Félagið er nú fjórða stærsta flugfélag í Evrópu og stærsta flugfélagið á Bretlandseyjum. easyJet er jafnframt eitt stærsta fyrirtæki Breta og var nýlega tekið inn í FTSE100 vísitöluna.

Um 2000 flugmenn starfa hjá easyJet og um 4500 flugþjónar og flugfreyjur. Meðalaldur flugvéla í flota easyJet er innan við 4 ár sem er með því yngsta sem þekkist hjá svo stóru flugfélagi.

easyJet hóf flug hingað til lands fyrir rúmu ári síðan og flýgur nú til þriggja áfangastaða frá Keflavík allt árið um kring, þ.e.a.s. til Lundúna, Manchester og Edinborgar. Gert er ráð fyrir að brottfarir eastJet í viku hverri verði orðnar ellefu frá og með febrúar næstkomandi.

Ísland hefur slegið í gegn hjá viðskiptavinum easyJet og flugleiðin á milli Lundunúa og Keflavíkur er með eina bestu sætanýtinguna í öllu leiðarkerfi easyJet, að því er segir í tilkynningunni.