Bílar

Porsche Macan spæjaður

Finnur Thorlacius skrifar
Ljósmyndir af endanlegri útgáfu nýja sportjepplings Porsche sem fengið hefur heitið Macan náðust á dögunum. Er bíllinn um margt líkur stóra bróður hans, Porsche Cayenne. Bíllinn er byggður á sama grunni og Audi Q5 jepplingurinn en bæði Porsche og Audi eru í eigu Volkswagen. Macan verður þó breiðari og lægri en Audi Q5 og fær öflugar vélar.

Macan mun í fyrstu koma í tveimur útgáfum, þ.e. S og Turbo og verða vélar þeirra 340 og 400 hestafla. Báðar eru vélarnar 3,0 lítra og sex strokka og styðjast við tvær forþjöppur. Því er um mjög öflugan jeppling að ræða sem samt mun kosta talsvert minna en Cayenne jeppinn og mun þessi nýi bíll líklega auka verulega sölu Porsche, sem náð hefur að auka sölu sína verulega með bílgerðunum Cayenne og Panamera á síðustu árum.

Porsche Macan mun keppa við jepplingana Range Rover Evoque, BMW X3 og X4, Audi Q5 og Mercedes Benz GLK. Macan verður fyrst kynntur á bílasýningunni í Los Angeles í haust og búist er við því að lægsta verð hans verði 45.000 dollarar, eða 5,4 milljónir. Dýrari verður hann þó hingað kominn.

Mest lesið




×

Mest lesið