Allt sem er norrænt er vinsælt í New York

„Við sjáum fram á að opna í haust í Brooklyn,“ segir Rut Hermannsdóttir en hún er að opna verslun, kaffihús, hanastélsbar og sýningarrými með áherslu á Norðurlöndin í New York.

Rut byrjaði að leggja drög að búðinni í New York ásamt Crystal Pei, kanadískri vinkonu sinni og Elliot Rayman fyrir ári síðan. „Allt norrænt virðist vera mjög vinsælt í Bandaríkjunum núna. Þemað er norrænt með fókus á íslenska, norska og finnska hönnun auk hönnunar frá Færeyjum, Grænlandi og Álandseyjum,“ segir Rut en vöruúrvalið verður allt frá smærri húsbúnaði yfir í skartgripi, bækur og tónlist með áherslu á endurvinnslu og lífræna framleiðslu. „Í búðinni viljum við gjarnan að fólki líði eins og það sé að koma í heimsókn á Norðurlöndin.“

Einnig verður sýningarrými fyrir norræna listamenn tengt versluninni sem og kaffihús sem breytist í hanastélsbar á kvöldin. „Við verðum með norrænan mat og áfengi og erum meðal annars komin í samstarf við Kaffismiðjuna á Kárastíg sem ætlar að brenna fyrir okkur kaffi.“ Rut er að leita að fleiri hönnuðum og hvetur áhugasama til að hafa samband við sig á póstfanginu rut.hermannsdottir@budin-nyc.com.