Instagram fer á fullt í samkeppni við Snapchat

Instagram kynnti í gær nýja þjónustu fyrir notendur. Nú verður hægt að senda myndir og myndbönd í einkaskilaboðum á Instagram. Nýi möguleikinn sem nefnist Instagram Direct gerir noetndum kleift að senda myndir og myndbönd í einkaskilaboðum til allt að 15 manns í einu. Frá þessu er meðal annars sagt frá á Time.

Það var einn af stofnendum Instagram, Kevin Systrom, sem kynnti þennan nýja möguleika.

Sendandi og viðtakendur myndanna geta skipst á skilaboðum fyrir neðan myndina og eins og á Facebook sést þegar og hvenær viðtakandinn opnar skilaboðin.

Með þessum nýja möguleika má segja að Insagram sé farið í beina samkeppni við Snapchat. En ólíkt Snapchat skilaboðunum munu Instagram myndirnar ekki hverfa eftir nokkrar sekúndur. Það er talið að Instagram muni síðar bæta við möguleikum eins og að teikna eða skrifa inn á myndir sem eru sendar eins og nú er hægt að gera á Snapchat.

Það verður þó ekki hægt að senda hverjum sem er myndir og myndbönd heldur geta aðeins vinir sent hver öðrum. Það er því óþarfi að hafa áhyggjur af klúrum myndum frá ókunnugu fólki.

Instagram er nú í eigu Facebook sem keypti fyrirtækið í apríl síðastliðnum fyrir um 127 milljarða króna. Instagram fór upphaflega í lofið í október 2010 og var hugsað fyrir iPhone en síðar Android síma. Mark Zuckerberg, stofnandi Facebook, hét því við kaupin að Instagram yrði áfram þróað þannig að fleiri gætu notað það.

Þetta þykir eðlileg og skynsamlega framvinda hjá Instagram en með tilkomu Snapchat urðu myndir og myndbönd í einkaskilaboðum ansi vinsæl.