Leonardo DiCaprio stofnar kappaksturslið

Leikarinn Leonardo DiCaprio hefur stofnað keppnislið í hinni nýju aksturskeppni Formúlu E. Í keppninni er eingöngu keppt á rafmagnsbílum og er henni ætlað að auka áhuga fólks á þeim og hraða þróun og nýsköpun meðal framleiðenda.

DiCaprio stofnaði liðið með Gildo Pallanca Pastor sem er eigandi fyrirtækisins Venturi Automobiles, en það framleiðir eingöngu rafmagnsbíla. Frá þessu er sagt á vef BBC.



„Framtíð plánetu okkar veltur á vilja okkar til að nýta sparneytin farartæki sem ganga fyrir hreinni orku,“ hefur BBC eftir leikaranum.

Fyrsti kappaksturinn í Formúlu E fer fram á næsta ári og verður keppt í 10 borgum víðsvegar um heiminn. Á fyrsta árinu munu liðin keppa á stöðluðum bílum, en framleiðendur eru svo hvattir til að byggja eigin bíla og sérstaka.