Fríverslunarviðræður tefjast

Röskun á starfsemi bandaríska ríkisins þar sem ekki hefur ekki tekist að fá ný fjárlög samþykkt gerir það að verkum að fríverslunarviðræðum Bandaríkjanna og Evrópusambandsins tefjast.

Starfsemin bandaríska ríkisins stöðvaðist að hluta og hundruð þúsunda ríkisstarfsmanna voru sendir í launalaust leyfi í vikunni þar sem repúblikanar sem hafa meirihluta í fulltrúadeild Bandaríkjaþings neituðu að samþykkja fjárlög ríkisins.

Sögðust þeir aðeins hleypa fjárlögum í gegn ef Obamacare, löggjöf sem felur í sér grundvallarbreytingar á heilbrigðislöggjöfinni vestanhafs, yrði frestað eða fjárframlög vegna hennar yrðu skert. Lokun af þessu tagi gerðist síðast fyrir átján árum en endanlegur kostnaður síðustu lokunar fyrir ríkissjóð hefur verið áætlaður um 1,4 milljarðar dollara á verðlagi þess tíma, jafnvirði 168 milljarða króna.

Bandarískir embættismenn áttu að koma til Brussel í næstu viku til viðræðna við embættismenn Evrópusambandsins vegna fríverslunarsamnings, en ekkert verður af því vegna lokunarinnar vestanhafs.

Aðeins bráðnauðsynlegri starfsemi er haldið úti, eins og varnar- og öryggismálum, þ.e löggæslu, hernum og dómstólum. Þá frestaði Barack Obama, Bandaríkjaforseti, ferð sinni til Asíu. Michael Froman, viðskiptafulltrúi Bandaríkjanna, tilkynnti embættismönnum í Brussel á föstudag að vegna lokunarinnar hefðu Bandaríkjamenn ekki tök á að senda fullt teymi samningamanna til Brussel en áfram yrði unnið að samningnum.

Ekki væri hins vegar hægt að ljúka samningnum fyrr en fjárlögin væru samþykkt í þinginu. Ríkisstjórn Obama og John Boehner, forseti fulltrúadeildarinnar, eru engu nær samkomulagi.

Í fyrsta lagi þarf að ljúka fjárlögum en bandaríska ríkið gæti einnig glímt við fjárþurrð ef ekki tekst að hækka skuldaþak ríkisins síðar í þessum mánuði.