Yellen fulltrúi aukins eftirlits

Fastlega er búist við því að Barack Obama Bandaríkjaforseti tilnefni í dag Janet Yellen sem næsta Seðlabankastjóra Bandaríkjanna, eitt valdamesta embætti í heimi.

Ef öldungadeild Bandaríkjaþings fellst á skipunina mun Yellen taka við af Ben Bernanke sem gegnt hefur embættinu í átta ár. Yellen hefur verið aðstoðar-Seðlabankastjóri síðustu tvö árin og verði hún skipuð í embættið yrði hún fyrsta konan til að gegna því. Yellen hefur gegn mörgum áhrifastöðum í bandarísku viðskiptalífi auk þess sem hún hefur kennt við London School of Economics og Harvard háskóla. En, hver er Yellen? Jón Daníelsson er einmitt hagfræðingur við London School of Economics.

„Janet Yellen er tiltölulega þekktur bandarískur hagfræðingur. Hún á að baki mjög góðan feril í háskólum í Bandaríkjunum. Hún hefur líka starfað í Seðlabankanum í Bandaríkjunum undanfarna áratugi. Hún var síðast útibússtjóri í San Francisco. (Seðlabankinn er með fjölda útibúa um öll Bandaríkin.) Yellen hefur tiltölulega ákveðnar skoðanir á fjármálamörkuðum og er hlynnt meira eftirliti með fjármálastofnunum þannig að hún er valin bæði af því að hún þykir góður akademískur hagfræðingur, hefur mikla þekkingu á Seðlabankanum og pólitískt séð er hún samhæfð Obama-stjórninni. Þannig að hún er talin hæfust þeirra kandídata sem eru í boði.“

Hvers vegna er Yellen valin? Er það vegna ástandsins eftir hrun?

„Ef kreppan í Bandaríkjunum hefði ekki orðið er mjög líklegt að öðru vísi kandídat hefði verið valinn. Hún er valin fyrst og fremst því henni er treyst til að fylgja eftir stefnu stjórnarinnar sem er það að auka regluverk og draga úr áhættu á fjármálamörkuðum. Hún er fulltrúi þeirra sjónarmiða í bandaríska stjórnkerfinu.“

Eru einhverjar líkur á því að þetta verði til þess að breyta í einhverju samskiptum Íslands og Bandaríkjanna?

„Það eru litlar líkur á því að það verði einhverjar grundvallabreytingar í því hvernig Seðlabankinn í Bandaríkjunum starfar. Þeir munu halda áfram að gera það sem þeir hafa gert. Ég held að fyrir Seðlabankann í Bandaríkjunum skipti Ísland engu máli, þannig að það verða engar breytingar hérna.“