Harmageddon

Sannleikurinn: Allir fréttamenn merktir varanlega

Andri Þór Sturluson skrifar
Fréttakonan María Lilja Þrastardóttir var fyrst til að uppfylla nýju lögin og láta merkja sig. Hún var ekkert sérstaklega sátt samt.
Fréttakonan María Lilja Þrastardóttir var fyrst til að uppfylla nýju lögin og láta merkja sig. Hún var ekkert sérstaklega sátt samt.
Allir fréttamenn landsins skulu merktir varanlega og skráðir hjá Fjölmiðlanefnd, samkvæmt lögum um fjölmiðla nr. 38/2011 sem öllum fjölmiðlum landsins er gert að starfa eftir. Fjölmiðlar þurfa að greiða skráningargjald, 15 þúsund krónur á fréttamann samkvæmt tillögu, og fylgist Fjölmiðlanefnd með að óskráðir fréttamenn séu ekki á ferðinni.



Elfa Ýr Gylfadóttir, framkvæmdastjóri Fjölmiðlanefndar, segir að vandamál hafi verið með fjölmiðlafólk og sums staðar hafa þeir skapað mikil vandræði. Grundvöllur þess að ákveðið hafi verið að setja reglur um fréttamannahald hafi verið að hægt væri að sjá hverjir væru eigendur fjölmiðlafólksins. Það hafi sýnt sig að ólar dugi ekki því þær losni oft af. Því sé í reglunum kveðið á um að allir sem starfa við fjölmiðla eða fréttamennsku verði merktir varanlega, annaðhvort með húðflúri eða örmerki undir húð.



Jafnframt er eigendum fjölmiðla gert að skyldu að skrá starfsmenn sína hjá Fjölmiðlanefnd og greiða skráningargjald sem samkvæmt tillögunum verður 15 þúsund krónur. Gjaldið er aðeins greitt einu sinni. Fólki sem á blaða- eða fréttamenn við gildistöku reglnanna verður gefinn kostur á að skrá þá við lægra verði, eða 10 þúsund krónur, ef það gerir það fyrir ákveðinn tíma. Við skráningu eiga eigendur að framvísa vottorði frá lækni um ormahreinsun.



Fjölmiðlanefnd mun fylgja reglunum eftir strax í vor. Menn á þess vegum muna vera á ferðinni með fellibúr og fanga fréttamenn. Ef þeir eru skráðir verður þeim strax sleppt. Ómerktir fréttamenn verða geymdir í tiltekinn tíma og sé þeirra vitjað geta eigendur leyst þá út fyrir áfallinn kostnað. Fjölmiðlanefnd er að láta innrétta góða geymslu í þessum tilgangi.



Elfa Ýr segir ekki vitað hversu margir starfi við fjölmiðla en þeir skipti líklega hundruðum. Hún segir líklegt að þeim muni fækka þegar reglurnar taka gildi því fólk sem ekki haldi fjölmiðlafólk af fullri ábyrgð og umhyggju muni væntanlega losa sig við þá. Þá sé líklegt að íþróttafréttamenn verði vanaðir og við það minnki vandræðin sem skapist af baráttu þeirra um yfirráðasvæði.



Sannleikurinn rekur öfluga og óvæga fréttastofu þar sem engum er hlíft og ekkert mál er of stórt eða of lítið. Sannleikurinn er háður öllum stjórnmálaflokkum og hagsmunaaðilum. Fréttastofa Sannleikans hefur Facebook-síðu en vinsamlegast látið hana í friði.






Velkomin á Vísi. Þessi vefur notar vafrakökur. Sjá nánar.