Microsoft eignast Nokia

Tölvurisinn Microsoft hefur keypt farsímahluta finnska fyrirtækisins Nokia, fyrir 5,4 milljarða evra, eða um 860 milljarða íslenskra króna.

Með í kaupunum fylgja einkaleyfi fyrirtækisins auk kortagrunns. Tilkynnt var um kaupin í nótt en gengið verður frá þeim endanlega snemma á næsta ári.

Þrjátíu og tvöþúsund starfsmenn Nokia munu flytja sig til og gerast starfsmenn Microsoft. Nokia, var á sínum tíma helsti risinn á farsímamarkaðinum en snjallsímar frá Apple og Samsung hafa svo gott sem gert út af við Nokia símana. Microsoft hefur einnig átt í vandræðum með að koma sér fyrir á farsímamarkaði og segir Steve Ballmer, forstjóri Microsoft að allir eigi eftir að græða á samningnum.