Flundra í Skorradalsvatni

"Haldiði ekki að þegar var verið að vitja um netin í morgun hérna hafi verið lifandi flundra (Platichthys flesus) í einu netinu," tilkynnti Pétur Davíðsson á Grund á Facebooksíðu sinni fyrir nokkru.

Pétur greinir frá því að flundra sé sjófiskur og er nýbúi í Andakílsá en hvernig hann komst í Skorradalsvatn er spurning og mikill leyndardómur. "Einu möguleikarnir eru 8 metra hár foss eða aðrennslipípan fyrir virkjunina. Báðir mjög fjarlægir möguleikar." Pétur segir að fulltrúi Veiðimálastofnunar sé búinn að sækja flundruna til rannsókna enda ekki gott ef hún kemst í stöðuvatn.

Áhugamenn um stangveiði hafa illan bifur á flundrunni og tengja minnkandi veiði á sjóbleikju á Íslandi við strandhögg hennar hér við land. Flundra, sem er ný flatfisktegund, einnig kölluð ósakoli, fannst fyrst hér á landi árið 1999. Hún er byrjuð að hrygna hér við land og rannsóknir sýna að hún keppir við bleikjuna um vistsvæði.