Hagnaður Iceland um 37 milljarðar á síðasta rekstrarári

Verslunarkeðjan Iceland skilaði góðu uppgjöri á síðasta rekstrarári sem lauk í lok mars s.l. Um 196 milljóna punda, eða 37 milljarða kr. hagnaður varð á rekstrinum fyrir skatta.

Fjallað er um uppgjörið í Financial Times. Þar segir að sala keðjunnar hafi aukist um 1,1% milli ára og nam vel rúmlega 2,6 milljörðum punda eða um 490 milljörðum kr.

Malcolm Walker forstjóri Iceland segir að keðjan hafi skilað betri útkomu en menn áttu von á. Þar á hann við að salan minnkaði á fyrri árshelmingi ársins en náði sér síðan á strik á þeim seinni. Hrossakjötshneykslið síðasta vetur kom ekki alveg eins illa við Iceland og margar aðrar verslunarkeðjur í Bretlandi sem selja matvæli.

Fram kemur að Iceland opnaði tæplega 40 nýjar verslanir á árinu en áætlað var að opna 15. Walker segist stefna á að opna einnig 40 nýjar verslanir á yfirstandandi rekstrarári. Þá er Iceland komið á netið með 25 af verslunum sínum þar sem boðið er upp á heimsendingar. Slíkum verslunum á að fjölga.

Þetta var fyrsta heila rekstrarárið frá því að Malcolm Walker og stjórnendateymi hans keyptu 77% hlut í Iceland af slitastjórnum Landsbankans og Glitnis fyrir 1,5 milljarða punda. Uppgjörið bendir til að þeir hafi gert mjög góð kaup.