Lundbeck setur áfengispillu á markaðinn

Danska lyfjafyrirtækið Lundbeck hefur sett nýtt lyf á markaðinn en það hefur þau áhrif að draga úr áfengisneyslu þess sem tekur það.

Í tilkynningu frá Lundbeck í morgun kemur fram að lyfið, sem ber nafnið Selincro, sé það fyrsta sinnar tegundar sem kemur á markaðinn í Evrópu á síðustu tíu árum.

Þegar er byrjað að selja Selincro í Noregi, Finnlandi, Póllandi og baltnesku löndunum. Lundbeck segir að innan tíðar muni lyfið fást í fleiri löndum.

Selincro er fyrsta lyfið sem dregur úr áfengislöngun sem er viðurkennt er af heilbrigðisyfirvöldum. Önnur lyf eins og antabus hafa þann tilgang að stöðva drykkju alfarið.