Bill Gates skammar sköllótta auðmenn

Bill Gates einn af stofnendum Microsoft og annar auðugasti maður í heimi notaði tækifærið nýlega til að húðskamma aðra auðmenn fyrir að leggja ekki nægilegt fé í lífsnauðsynlegar lyfjarannsóknir.

Þetta kom fram í ræðu Bill Gates á ráðstefnu um verkfræði í London fyrir helgina. Gates segir að út frá þörfum mannkynsins ætti helsta forgangsverkefni í rannsóknum í dag að vera að finna bóluefni gegn malaríu. Hinsvegar sé nær engu fé varið í þetta verkefni.

Ef einhver vill aftur á móti rannsaka hvort hægt sé að finna lækningu gegn skalla er mokað í hann fé. Með þessu vill Bill Gates benda á að þeir sem hafa fé aflögu til að setja í rannsóknir séu að stórum hluta efnaðir sköllóttir menn.

Bill Gates er upphafsmaður klúbbs milljarðamæringa í heiminum sem ákveðið hafa að gefa helminginn af auði sínum til góðgerðaverka annað hvort meðan þeir lifa eða að sér látnum. Meðal annarra í þessum hópi má nefna Warren Buffett, George Soros, George Lucas og Richard Branson.

Samanlagður auður þeirra er talinn vera yfir 150 milljarðar dollara. Helmingur þeirrar upphæðar samsvarar um sexfaldri landsframleiðslu Íslands.