Rajoy ætlar að birta yfirlit yfir eignir sínar

Mariano Rajoy, forsætisráðherra Spánar, segir að stjórnvöld muni leggja meiri áherslu á gagnsæi og baráttu gegn spillingu, með það fyrir augum að endurheimta traust íbúa landsins, en mótmæli í stærstu borgum Spánar, þar sem megininntakið er barátta gegn spilltri stjórnsýslu, hafa verið fjölmenn undanfarna mánuði.

Á vefsvæði Wall Street Journal (WSJ) í dag, er frá því greint að skoðanakannanir meðal íbúa Spánar sýni mikið vantraust í garð stjórnvalda. Þá hefur þrálátur orðrómur verið um það í umræðudálkum blaða á Spáni, að Rajoy sjálfur og stjórnarflokkarnir hafi fengið miklar peningagreiðslur frá fjármálafyrirtækjum á Spáni. Þessu hefur Rajoy neitað, og sagði hann í sjónvarpsviðtali í gær að hann myndi opinbera allar fjármunaeignir sínar og skattgreiðslur til þess að eyða efasemdum meða íbúa Spánar.

Sjá má frétt WSJ hér.