Sleppa við hraðasektir vegna rangrar leturgerðar

Þúsundir ökumanna í Bretlandi prísa sig sæla.

Ósjaldan hefur heyrst að mál hafi verið felld niður vegna formgalla eða tæknilegra atriða, en ekki oft um umferðalagabrot. Mál þetta varðar heldur ekki fáa, heldur þúsundir ökumanna. Þeir voru allir sakaðir um of hraðan akstur á M42 hraðbrautinni vestur af Coventry í Bretlandi. Þar eru upplýst merki sem gefa til kynna hámarkshraðann hverju sinni, sem breyst getur eftir umferðarþunga, tíma dags eða umferðaróhöppum.

Nú hafa dómarar fundið út að stafirnir sem sýna hámarkshraðann eru í of mjórri leturgerð og fyrir vikið ógreinilegir. Fyrir vikið sleppa allir þeir sem fengu hraðasektir á umræddum vegi í fyrra við að borga sektirnar. Vitnað er í dómnum um þau lög sem gilda um slík skilti en þar er ákvæði um stærð og breidd stafa. Þeir eru margir lagakrókarnir en þessi sparaði mörgum fé.