Nokia-ráðstefna í Abu Dhabi - Kynna meðal annars nýjan "spjaldsíma“

Nokia hefur kynnt fyrstu spjaldsímana (e. phablets), sem eru óvenjustórir símar og í leiðinni kynnti Nokia fyrstu spjaldtölvu sína. Þetta kemur fram á BBC.

Bæði nýi síminn og spjaldtölvan eru af tegundinni Lumia, annars vegar Lumia 1520 og hins vegar Lumia 2520.

Nokia stendur fyrir ráðstefnu í Abu Dhabi þessa dagana undir yfirskriftinni Nokia World. Þetta mun vera stærsti viðburður Nokia áður en sölunni á Nokia yfir til tölvurisans Microsoft lýkur endanlega.

Microsoft samþykkti að kaupa farsímahluta Nokia fyrir 5,4  milljarða evra, eða um 860 milljarða íslenskra króna og endanlega verður gengið frá kaupunum snemma á næsta ári.

„Síðustu tvö ár hafa Microsoft og Nokia verið að berjast á markaðinum, með því að vinna saman eiga þeir meiri möguleika á að verða betri en þegar þeir eru í sitthvoru lagi,“ segir Martin Garnaer frá CCS Insight.

Hann segir að Microsoft geti líka eytt mun meiri pening í markaðssetningu en Nokia gat gert eitt og sér.

Eins og fram kom á Vísi í dag, kynnti Nokia að á nýju tækjunum yrði hægt að komast inn á fleiri öpp en hingað til.