Þrír laxar á land í Blöndu í morgun

Tveir nýgengnir laxar og einn hoplax að auki hafa fengist í morgun við opnun svæðis 1 í Blöndu. Þetta kemur fram á agn.is. Hermann Svendsen veiddi fyrsta laxinn.

Eins og kom fram á Vísi fyrr í morgun veiddist fyrsti laxinn einnig í morgun í Norðurá þegar sumarveiðin opnaði þar.

"Blanda opnaði í morgun og eru "þrír" laxar komnir á land nú þegar. Tveir glæsilegir nýgengnir laxar úr Damminum og svo einn hoplax á Breiðunni. Fyrsti í Blöndu kom á land klukkan 7.28 eftir harða baráttu. Veiddist hann því aðeins örfáum mínútum á eftir fyrsta laxi sumarsins sem veiddist í Norðurá, en veiðar hófust einnig í Norðuránni í morgun. Bjarni Júl, formaður SVFR, veiddi því fyrsta lax sumarsins, sem reyndist vera hrygna og var áætluð 10 pund.

Að Bjarni og Norðuráin hafi orðið fyrri til í morgun á sér þó eðlilegar skýringar því eins og flestir vita sem þekkja til Blöndu, þá tekur mjög langan tíma að eiga við nýgengna stórlaxa af Blöndukyni. Tímamismunur hefur sjálfsagt einnig nokkur áhrif.

Svo sannarlega frábær tíðindi og við bíðum spennt eftir frekari tíðindum frá þeim sem standa vaktina við árnar sem opnuðu í morgun," segir á agn.is