Hægir á í stærsta hagkerfi Suður-Ameríku

Hagvöxtur í brasilíska hagkerfinu mældist 0,6 prósent á þriðja ársfjórðungi sem var mun minna en búist hafði verið við, að því er segir í frétt á vefsíðu breska ríkisútvarpsins BBC. Tölurnar eru sagðar hafa komið fjárfestum og stjórnvöldum í Brasilíu mjög á óvart, og segir greinandi hjá bankanum BES Investimento að tölurnar séu „hræðilegar" og hljóti að hreyfa við stjórnvöldum, og jafnvel kalla á aðgerðir að hálfu þeirra til þess að örva hagkerfið.

Allt útlit er fyrir að hagvöxtur verði frekar lítill í ár í Brasilíu, eða um eitt prósent. Í fyrra var hann 2,7 prósent og árið 2010 7,5 prósent. Þrátt fyrir að það sé á hægja á vextinum í Brasilíu þá hefur staða efnahagsmála þar batnað til muna, og er það ekki síst að þakka miklum hrávöruviðskiptum við Kína og fleiri ríki í Asíu.

Sjá má umfjöllun BBC um gang mála í Brasilíu hér.