Rannsókn íslensks lektors í Harvard vekur athygli

Niðurstöður rannsóknar íslensks lektors við Viðskiptaháskóla Harvard í Bandaríkjunum á tengslum þjórfjár og spillingar hafa vakið athygli vestan hafs.

Sá sem hér um ræðir er Magnús Þór Torfason lektor í nýsköpunardeild skólans. Hann kemst að þeirri niðurstöðu að í þeim löndum þar sem þjórfé sé algengt ríki meiri spilling en í öðrum löndum. Rannsóknin náði til 33 starfsgreina þar sem algengt er að gefa þjórfé eins og til þjóna á veitingahúsum, hárgreiðslufólks og leigubílstjóra.

Í umfjöllun The Washington Post um málið kemur fram að Magnús Þór telur að ástæðan fyrir þessu sé einkum sú að þeir sem gefa þjórfé ætlist til þess að fá eitthvað aukalega og því meira af slíku eftir því sem meira er gefið af þjórfé.

Rannsókn Magnúsar sýnir að spilling er minnst á Íslandi og hinum Norðurlöndunum auk Nýja Sjálands þar sem ekki tíðkast að gefa þjórfé.

Spillingin er hinsvegar mest í löndum eins og Grikklandi, Tyrklandi, Egyptalandi og Argentínu þar sem þjórfé er hvað algengast.