Sjórán kosta neytendur yfir 200 milljarða í hækkuðu vöruverði

Reikna má með að starfsemi sjóræningja undan ströndum Sómalíu muni kosta neytendur í heiminum í ár yfir 200 milljarða króna í hækkuðu vöruverði.

Þetta eru niðurstöður útreikninga greiningarfyrirtækisins Seaintels sem birtir eru í vikulegu fréttablaði þess. Um er að ræða hækkun á vöruverði vegna aukins kostnaðar á fraktflutningum meðfram ströndum Sómalíu en þar er að finna einhverja fjölförnustu sjóleið í heiminum enda liggur hún til og frá Súez skurðinum.

Fraktin er orðin dýrari en áður vegna þess að þau skipafélög sem sinna henni þurfa að greiða stöðugt hærri tryggingargjöld vegna sjóræningjanna. Þar að auki þurfa félögin að greiða aukatryggingar til að standa straum af lausnargjaldi fyrir þær áhafnir sínar sem lenda í klóm sjóræningjanna þegar þeir ræna flutningaskipum.

Þá er ótalin sá kostnaður sem skapast þegar skipafélögin ákveða að sigla framhjá þessari siglingaleið þar sem hún er orðin of hættuleg að þeirra mati. Þá þarf yfirleitt að sigla skipunum fyrir Góðrarvonarhöfða á syðsta odda Afríku en slíkt bætir vikum við siglinguna með tilheyrandi kostnaði.