Olíurisar vilja leita að olíu við austurströnd Grænlands

Mikill áhugi er fyrir áframhaldandi olíuleit við austurströnd Grænlands. Nýlega voru boðnar út 19 blokkir, eða svæði, til olíuleitar og vinnslu á Grænlandshafi og sóttu 11 olíufélög um þessi svæði.

Meðal þeirra sem hafa áhuga á þessu svæði má nefna olíurisa á borð við BP, ExxonMobil, Chevron og Statoil. Leitarsvæðið sem boðið er út er 50.000 ferkílómetrar að stærð.

Í frétt um málið í Jyllands Posten segir að á næstunni muni heimastjórn Grænlands velja bestu umsóknirnar sem bárust í þessa olíuleit og vinnslu, það er í þeim tilvikum þar sem fleiri en eitt olíufélag hafa sótt um sömu svæðin sem í boði eru.